طلباء کی شمولیت کو فروغ دینے کے لئے حکومت نے سووچھ بھارت انٹرن شپ کا آغاز

نئی دہلی، حکومت ہند نے یونیورسٹیوں اور اعلیٰ تعلیمی اداروں کے طلباء کے لئے ‘‘سووچھ بھارت سمر اِنٹرن شپ-سووچھتا کے 100 گھنٹے’’کا آغاز کیا ہے۔اس کے تحت طلباء کو اپنے ادارے کی منظوری اور اپنے منتخب کردہ گاوؤں میں سووچھتا سے متعلق سرگرمیوں کے لئے تقریباً 100 گھنٹے لگانے ہوں گے۔اس اِنٹرن شپ میں شرکت کرنے والے طلباء صفائی ستھرائی کے بارے میں گاوؤں کے لوگوں میں بیداری لانے کے لئے اطلاعاتی ، تعلیمی اور مواصلاتی سرگرمیاں انجام دیں گے۔طلباء گاوؤں میں ٹھوس کچرے کے بندوبست سے متعلق سرگرمیاں بھی انجام دیں گے۔

اِنٹرن شپ کی تکمیل پر اِنٹرن شپ پروگرام کے سبھی شرکاء کو سووچھ بھارت سمر اِنٹرن شپ سرٹیفکیٹ دیا جائے گا۔ان سرٹیفکیٹ کے علاوہ بہترین کارکردگی کا مظاہرہ کرنے والے اِنٹرن کو کالج کی سطح پر شیلڈ؍کپ اور یونیورسٹی کی سطح پر 30ہزار ، 20ہزار اور 10ہزار روپے کے نقد انعامات دیئے جائیں گے۔ریاستی سطح پر نقد انعام کی رقم 50ہزار ، 30 ہزار اور20 ہزار روپے ہوگی، جبکہ قومی سطح پر انعامی رقم دو لاکھ، ایک لاکھ اور50 ہزار روپے ہوگی۔

یہ اطلاع فروغ انسانی وسائل کے وزیر مملکت ڈاکٹر ستیہ پال سنگھ نے لوک سبھا میں آج ایک سوال کے تحریری جواب میں دی۔