کانگریس صدر راہل گاندھی نے خاتون ریزرویشن بل معاملے پر وزیر اعظم نریندر مودی کو خط لکھ کر کہا ہے کہ حکومت پارلیمنٹ میں خاتون ریزرویشن بل پاس کرائے، کانگریس پارٹی اس کی پوری حمایت کرے گی۔
کانگریس نے ایک بار پھر پارلیمنٹ اور اسمبلیوں میں خواتین کو 33 فیصد ریزرویشن دینے کا مطالبہ کیا ہے۔ اس کے لیے کانگریس صدر راہل گاندھی نے وزیر اعظم نریندر مودی کو خط لکھا ہے۔ خبروں کے مطابق وزیر اعظم نریندر مودی کولکھے گئے خط میں راہل گاندھی نے کہا ہے کہ مرکزی حکومت خاتون ریزرویشن بل لے کر آئے، کانگریس اس کی پوری حمایت کرے گی۔
ایسا پہلی بار نہیں ہے جب کانگریس کی طرف سے یہ ایشو اٹھایا گیا ہے۔اس سے قبل2017 میں بھی کانگریس کی سابق صدر سونیا گاندھی نے وزیر اعظم مودی کو خط لکھ کر کہا تھا کہ ’’آپ کی حکومت کے پاس لوک سبھا میں اکثریت ہے اور آپ خاتون ریزرویشن بل لے کر آئیے، کانگریس بھی اس کی پوری حمایت کرے گی۔‘
قابل ذکر ہے کہ 2010 میں خاتون ریزرویشن بل راجیہ سبھا میں پاس ہوا تھا لیکن لوک سبھا میں یہ بل اس وقت پاس نہیں ہو پایا تھا۔ کانگریس کے ذریعہ پیش کیے گئے بل کے مطابق لوک سبھا اور راجیہ سبھا میں خواتین کو 33 فیصد ریزرویشن دیا جانا ہے۔ خاتون ریزرویشن کا مطالبہ اس لیے کیا جا رہا ہے تاکہ پارلیمنٹ میں خواتین کو برابری کا حق مل سکے۔
دوسری طرف مہیلا کانگریس کارکنان نے سڑکوں پر اتر کر خاتون ریزرویشن کا مطالبہ کیا ہے۔ انھوں نے اپنے مظاہرے کو ’مہیلا آکروش‘ کا نام دیا ہے۔ انھوں نے پوچھا ہے کہ خاتون ریزرویشن آخر ٹھنڈے بستے میں کیوں ہے؟
[قومی آواز سے ]
एक टिप्पणी भेजें