’پرگتی‘ کے توسط سے وزیراعظم کی گفت وشنید

نئی دہلی۔ وزیراعظم نریندر مودی نے ’پرگتی‘ کے توسط سے 26ویں گفت وشنید کی قیادت کی۔ یہ آئی سی ٹی پر مبنی ملٹی موڈل پلیٹ فارم ہے جس کا تعلق سرگرم حکمرانی اور بروقت نفاذ جیسے اُمور سے ہے۔

25 پرگتی میٹنگوں میں ، جو اب تک منعقد ہوچکی ہیں، ان میں مجموعی طور پر 227 پروجیکٹوں پر نظر ثانی کی گئی ہے ان میں 10 لاکھ کروڑ روپئے سے زائد کی سرمایہ کاری ہوئی ہے۔ عوامی شکایات کا ازالہ اور اس کی مختلف شعبہ جاتی کیفیت پر بھی نظرثانی کی گئی ہے۔

26ویں میٹنگ میں وزیراعظم نے شکایات کے موصول ہونے اور ان کی نوعیت اور ان پر ہوئی کارروائی کا جائزہ لیا، جن کا تعلق ریلوے اور ڈاک گھروں سے تھا۔ انہوں نے پوسٹل اور ریل نیٹ ورک میں ڈیجیٹل لین دین کے فروغ کی اہمیت پر زور دیا اور خاص طور سے ’بھیم ایپ‘ کے استعمال پر اصرار کیا۔

وزیراعظم نے ، ریلوے، سڑک، پٹرولیم اور بجلی کے شعبوں کے 9 بنیادی ڈھانچہ پروجیکٹوں کا جائزہ لیا۔ یہ پروجیکٹ ہریانہ ، راجستھان ، گجرات ، مہاراشٹر ، اترپردیش، اڈیشہ ، بہار ، جھارکھنڈ، مغربی بنگال، تلنگانہ، تملناڈو ، آندھراپردیش سمیت متعدد ریاستوں میں واقع ہیں۔ ان میں مغربی ڈیڈی کیٹیڈ مال بھاڑا گلیارہ اور چار دھام مہامارگ ویکاس پری یوجنا بھی شامل ہیں۔

وزیراعظم نے اے ایم آر یو ٹی مشن کے نفاذ اور اس کی پیش رفت کا بھی جائزہ لیا۔ انہوں نے پی ڈی ایس آپریشنوں کے پورے کے پورے کمپیوٹرائزیشن کے نشان زد پروگرام کے نفاذ کا بھی جائزہ لیا۔