نئی دہلی، آبی وسائل، دریاکی ترقیاتی اور گنگا کے احیاء کی وزیر محترمہ اومابھارتی نے کہا ہے کہ ان کی وزارت کے تحت ایک کمیٹی تشکیل دی جا رہی ہے، جو بہار میں کانکنی کے نتیجے میں گنگا میں جمع ہونے والی گاد کی صفائی کے معاملے کی دیکھ بھال کرےگی۔ واضح رہے کہ یہ گاد دریا کے بہاؤ میں رکاوٹ ڈالتی ہے۔
وزیر موصوفہ کی نگرانی میں جاری‘گنگا نریکشن ابھیان’ کے چھٹویں دن اس کے ایک حصے کے طور پر سلطان گنج، بہار میں گنگا چوپال سے خطاب کرتے ہوئے وزیرموصوفہ نے کہا کہ سلطان گنج میں ایک سویج ٹریٹمنٹ پلانٹ کی تعمیر عمل میں آئی ہے۔
انہوں نے حیاتیاتی گوناگونی اور گنگا میں مختلف آبی جانوروں کی فطری بحالی کے متعلق اقدامات پر گفتگو کرتے ہوئے کہا کہ صاف ستھری گنگا کی بحالی کیلئے قومی مشن کے تحت مختلف کوششیں کی جا رہی ہیں۔ محترمہ بھارتی نے کہا کہ نمامی گنگے پروگرام کے تحت جنگل بانی اور پودھ کاری کی سرگرمیاں دریائے گنگا کے کنارے کنارے انجام دی جا رہی ہیں تاکہ مٹی کے کٹاؤ کو روکا جا سکے۔ اس کے ساتھ ہی ساتھ گنگا میں کثیف پانی اور صنعتی فضلے کے گرنے کی روک تھام بھی کی جا رہی ہے۔
وزیرموصوفہ نے کہا کہ نمامی گنگے ٹیم لگاتار سیویج ٹریٹمنٹ پلانٹوں کی فراہمی اور تعمیر کے کام میں لگی ہوئی ہے تاکہ وافر سیویج ٹریٹمنٹ صلاحتیں بہم پہنچائی جا سکیں۔ ساتھ ہی ساتھ ایسے پروجیکٹ چلائے جا رہے ہیں، جن کے توسط سے دریائے گنگا کے کنارے واقع گاؤں اور شہروں کو کھلے میں رفع حاجت کے قبیح طریقے سے نجات دلائی جا سکے۔
انہوں نے کہا کہ ریاست میں موجودہ گھاٹوں کو ازسرنوبحال کیاجائےگا اور نئے گھاٹوں کی تعمیر بھی کی جائے گی۔ انہوں نے بتایا کہ زائرین اور معتقدین کیلئے گھاٹوں پر ریستوراں بھی تعمیر کئے جائیں گے۔
سلطان گنج میں اپنے خطاب کے بعد وزیر موصوفہ نے مونگیر میں ایک دیگر گفتگو شنید اجلاس کا اہتمام کیا۔ یہاں وزیر موصوفہ نے محکمہ جنگل بانی، سی آئی ایف آر آئی، بھارت کے جنگلی جانوروں کے انسٹی ٹیوٹ اور این ای ای آر آئی کے ساتھ گفت و شنید کی اور گنگا سے متعلق مختلف پہلوؤں پر تبادلۂ خیالات کئے۔
एक टिप्पणी भेजें